.jpg)
“Сарнай цэцэг”, “Чамайгаа оллоо”, “Чиний хайранд би” зэрэг олон сайхан дуугаараа нэгэн цагт сонсогчдын сэтгэл, зүрхийг догдлуулж явсан ч, хэсэг хугацаанд урлагаас хөндийрөөд байсан дуучин М.Үүрцайх нэгэн хэвлэлд ярилцлага өгчээ.
Тэрээр наадмын өмнө “Uuree hit’s” уран бүтээлээ гаргасан байна. Түүний хувьд өнгөрсөн жилүүдэд урлаг гэхээсээ илүү хувийн амьдралдаа анхаарч хүү, охин хоёрын ээж болжээ. Энэ тухайгаа “Хүү, охин хоёроо хараад гэр зуураа л байлаа. Би урлагаасаа хэсэг завсарлага авснаас алга болоогүй. Эмэгтэй хүн бүр гэр бүлдээ зарцуулах цагийг заавал гаргах ёстой. Үр хүүхдээ том болгоно, хичээл сургууль, гэр ахуйн асуудал гээд л анхаарах ёстой зүйлс олон байдаг шүү дээ. Тэр бүхнийгээ цэгцэлсний дараа уран бүтээлдээ 100 хувь сэтгэл зүрхээ зориулахаар эргэж ирсэн хэмээн ойлгож болно. Хүүхдүүд маань ч гэсэн одоо биеэ даагаад, гараас гарсан. Одоо өөрийгөө бусдад илүү таниулах, өөрийгөө нээх цар хүрээтэй уран бүтээл гаргахыг л эрмэлзэж байна даа” гэжээ.
Мөн тэрээр бааранд дуулж үзээгүй гэдгээ онцолж “Энд тэндэхийн сонин, сайтад “Үүрээ бааранд тасраад уначихсан, архи дарсанд орсон байна, баарны дуучин болжээ” гээд л бичигдсэн. Миний хувьд хэвлэлд ярилцлага өгөөгүй маш олон жил болсон. Энэ тухай нэг их ам нээж байгаагүй юм байна. Маш нууц зүйл ярих гээд байна шүү дээ. Уран бүтээлээ хүмүүст хүргээд бага зэрэг биеэ тоочихсон, дээр нь осолд ороод хэвтэрт орсон, ээжийгээ эрт алдсан гээд олон хүчин зүйлс, шалтгааны улмаас нэг хэсэг шоудах, архи дарс сонирхож уух үе байсныг нуухгүй. Хүүхэд ч байлаа, алдаж онох зүйлс ч их байсан. Одоо бол тэр оддын өвчин, хор нь гарчихсан. Яах вэ олны танил гэж байхаас их зан гаргах ямар ч шаардлагагүй. Зарим хүмүүс таньдаг хэр нь танихгүй зөрөөд гарах жишээтэй. Тэр надад утгагүй санагддаг. Таньдаг бол таньдгаараа л байх хэрэгтэй. Дулмаа бол Дулмаа, Үүрээ Үүрээгээрээ байх шиг сайхан. Сайн уу гээд мэндлэхэд хэний ч амнаас юу ч унахгүй. Яг хэлэхэд, би амьдралдаа бааранд дуулж үзээгүй шүү дээ. Баар, лоунжид дуулдаг дуучид арай өөр байдаг байх. Тэнд англи, эсвэл хуучны монгол дуунууд дуулах шаардлагатай байдаг болов уу, сайн мэдэхгүй юм. Би өөрөө англи хэлгүй учраас үг хэллэг буруу хэлчихвэл яах вэ гээд асуудал их. Хүмүүс бүгд л хэлтэй болсон. Ер нь бол бааранд дуулж үзээгүй” гэжээ.
Сэтгэгдэл (0)